يقول صاحب القصة : تعرفت على
واحدة عن طريق الانستا كنت أشوف
ستورياتها وهي نفس الشيء، وصارت
سوالف بينا وتقربنا لبعض ، ومع
الوقت حبيتها حب وتعلقت فيها حيل
وهي نفس الشيء وقلت لها أنا
من زمان أعرفك واثق فيك وتثقين
فيني ليش ولا مره أرسلت لي
صورتك أشوفك رغم أنك دائم تطلبين
تشوفيني ، وأرسل لك بس
أنت ولا مره فكرتي أن ترسلين
وجهك ! قالت أنا أخاف من
هالمواضيع وما أدري إيش فأصريت عليها
ترسل حسيت إنه فيها شيء ما
تبي أشوفها وبعد إصرار طويل أرسلت
وجهها يا جماعة قسم بالله كانت
جميلة بمعنى الكلمة استغربت إنها مخبية
هالجمال عني كل هالفترة كملنا مع
بعض سنة كنت سعيد معاها بكل
لحظة تمر علينا ومن كثر حبي
لها قررت أخطبها واتزوجها وكلمتها بس
تفاجأت إنها رفضتني تقول أنا ما
أفكر بالزواج أبد صراحة انجرحت من
ردها أنا ما أبيها بعـ'ـلاقة حرام
لأني من جد أحبها وأبيها قلت
أنا أبيك بالحلال بكمل معك باقي
عمري ورفضت واختفت عني أسبوع ما
ترد علي أبد تعبت وأنا أتصل
عليها وأرسل لها ما ترد علي
تضايقت حيل وفقدتها حسيت شيء فيني
******* بدونها كانت إنسانة مثالية عدلت
فيني أشياء كثيرة خلتني أترك أمور
كثيرة والتزمت بأشياء كثيرة وبسببها صارت
حياتي ناقصة بدونها وصلت لمرحلة أترجاها
ترد علي وقلت إني بكنسل فكرة
الزواج بس ترجعين لي وردت علي
بعد ما قرأت كلامي برد صدمني
قالت اسمع يا فلان أنا اختفيت
عنك أسبوع كنت أبي أقعد وأفكر
لحالي عشان أقدر أواجهك بالشيء اللي
بقوله لك الحين الصور اللي كنت
أرسلها لك ما هي لي أنا
كذبت عليك وأنا إنسانة أقل من
عادية وماني حلوة وكل اللي حولي
يتنمرون على شكلي وخفت إني أرسل
لك صورتي وتتركني أنا الحين صارحتك
ولك حرية الرأي والاختيار بتكمل معاي
ولا تتركني جلست شوي فهيت من
الكلام ما توقعت بيوم إنها تكذب
علي بموضوع زي كذا وأنا والله
كان شكلها مجرد فضول أنا حبيتها
من أسلوبها مو شكلها طلبت أشوفها
فضول مو أكثر والحين محتار حيل
وقاعد أفكر من فترة هل أكمل
معاها وآخذها ولا أرجع خطوة ورا
خوفي إنها مكذبة بشيء ثاني علي
حيل مقلقني ومخليني متردد فرحت وكلمت
أختي اللي هي أكبر مني واعتبرها
صديقة لي كلمتها عن البنت وقالت
إذا تحبها وتبيها أكيد الشكل مو
مهم مصير الإنسان يكبر ويروح شكله
ويبقى طبعه وعشرته الحلوة أقنعتني بكلامها
ورجعت للبنت وكلمتها لأني فعلاً متمسك
فيها وأبيها وحلفتها إذا هي كاذبة
علي بشيء غير شكلها قالت لي
لا وأنه إذا بجي أخطبها هي
موافقة تعنيت لها وسافرت مع أهلي
عشان أخطبها وتم كل شيء على
خير وملكنا بس من عادات البنت
إنه ما في شوفة شرعية وسألت
أختي عنها قالت البنت أقل من
عادية ممكن شوية عيادات تصير مقبولة
فيها أشياء لازم تتعدل بس بشكل
عام طبعها وشخصيتها حيل حلوة وصدقني
أنا بكون معاها وأعلمها وبتشوفها بالشكل
اللي يرضيك وافقت وكملت بالشيء اللي
بديته وتم الزواج وفعلاً كان الشكل
مو كل شيء بالدنيا البنت كانت
تحبني ومهتمة فيني وفي بيتها وقايمة
مع أمي وتحترمها وتقدرها وأختي حبتها
وتقول إنه أي مناسبة نروح لها
يمدحون زوجتك ويثنون عليها بالخير والحمد
لله إني تمسكت فيها واخترتها وطلعت
هي نعمة زوجة وشريكة الحياة القصة
الثانية تقول صاحبة القصة أنا تزوجت
من ثلاث سنوات وما عندي أطفال
قاعدة لحالي كل وقت بشقتي لا
أنيس ولا ونيس وزوجي إما طالع
مع أخوياه ولا مداوم والحمد لله
حياتي مستقرة ما في مشاكل بيننا
بس مشكلتي إني بيتوتية بزيادة المهم
توفى أبو زوجي الله يرحمه وبعد
العزا تهاوشوا إخوان زوجي وأخواته على
أمهم كل شخص يقول خذها عندك
أنا ما عندي مكان هي عجوز
كبيرة بالعمر وتحتاج رعاية واهتمام وأنا
أمي متوفية بهالموقف تمنيت إن أمي
عايشة والله لأحطها بعيوني ولا أرميها
على أحد كذا المهم قلت لزوجي
هاتها عندي تونسني وأونسها أنا الحالي
ما عندي أحد بحطها على عيني
هذه بمقام أمي قال لا بعدين
راح تطفشين وأنا اللي راح أبتلش
مع إخواني قلت أبد لو سمعت
مني كلمة تذمر لك حرية التصرف
معي وجابها عندي سبحان الله من
يوم دخلت شقتي جتني البركة ملت
علي المكان صرت معاه دايم وتسولف
علي وأسولف عليها ونأكل مع بعض
قهوة مع بعض وصرت أعاملها زي
أمي أحنّي يدينها عاد تعرفون كبار
السن يحبون الحنة وكانت تنبسط وتدعي
لي وكنت أفصل لها ملابس وتنبسط
عليهم يا روحي هي والله إني
أروّشها وألبسها بنفسي سبحان الله ضافت
حياة وبركة بالبيت جت مرة وقالت
لزوجي إنها بتطلع معه بتروح لجارتها
القديمة تزورها وراحت ولما جت كانت
جايبت لي طقم بناجر ذهب أربع
حبات واهدتني إياهم وقتها تشققت من
الوناسة والفرحة وصحت ودموعي أربعه أربعه
كانت أثمن هدية جتني بحياتي مو
إنها ذهب وبس لا لأنها تذكرتني
وتعنت عشاني وبس والله عايشين مع
بعض الحين وأبيكم تدعون لها بالصحة
والعافية لأنها صارت أمي الثانية الله
يسعد قلبك ويرزقك من حيث لا
تحتسبين ويا رب مثل ما فرحتيها
واحتويتيها إنه ما يدور حولك إلا
هي جنبك وطفلك بحضنـ'ـك وأنتم بأتم
العافية القصة الثالثة،، تقول صاحبة القصة
: من فترة وأنا شاكّة بزوجي
إنه عنده شيء كل ما جلست
جنبه يطفي جواله أو يطير الصفحة
ويدخل برنامج ثاني تعرفون الحس اللي
يجيكم إنه في شيء قلبكم حاس
هذا الشيء اللي حسّيته المهم شغلت
كيد النساء حقي ويوم حطيت روج
على ثوبه قلت إذا برر فمعناها
فعلاً يخون وإذا استغرب فلا نظيف
وناديته وارتبك وتلعثم قال منين جا
هذا؟ أكيد من أغراضك هنا عاد
حطيته براسي قلت لا أنا ما
عندي هاللون ولا أحبه قال ما
أدري وسكت وعيونه التوتر فيها واضح
بالليل انتظرته لين نام وفتحت جواله
لأني عرفت باسورده وهو ما يدري
وفعلاً شكوكي طلعت بمحلها طلع مواعد
وحدة يروح معاها فندق وبيدخلها الفندق
باسمي على أساس إنه هي زوجته
قلت عاد بيني وبين نفسي وربي
ما راح تسلم مني أنت وياها
ومن بكرة هو دخل يتروش ويتضبط
قال أنا طالع للعيال بالاستراحة وراح
أطول قلت له تمام وبقلبي قلت
وبتكون آخر طلعة لك انتظرت ساعة
ونص وبعدها مسكت جوالي بكل هدوء
وبلغت عليه خلوة غير شرعية وراح
فيها وسمعته طاحت بالأرض عند جماعته
وأهله وطلبت منه الطلاق وارتحت وأحمد
ربي مليون مرة إنه ما جاني
منه أطفال وبس انتهت قصصنا لليوم.
